फरक त आईले बा ?

प्रनाम आ जय भोजपुरी 

तब -

गांवे मे सब केहु से घरे घरे घर पाछे चांदा असुलाई , फलानवा के घर से पिअर साडी , होकरा घरे असवे बिआह परल रहल ह , उ अपना भउजी के नवका लुगा ले ले आवत बा , तले ले एगो धउरल आवत बा कहत बा हई ल लो ई पंडाल मे खाति सही रही ।

कुछ अईसही गांव मे हेने से होने से जुटाई के साडी से पंडाल सजावल जाई , ताव किना के आई आ बांस प साटल जाई , चमकउवा ताव से तिकोना काटि काटि के लप लप झप झप करे वाला झालर बनी , रोज जगरम होई , गांवे के लोग गवनई करी, गांव के मय मेहरारु लईका फईका लईकी ओईकी रोज सांझि खा आ सबेरे आरती खाति जुटिहन स आ भसान के दिने दुआरी दुआरी जाई के सब केहु के दुर्गा जी के दर्शन करावल जाई फेरु कोलनाला भसान होई । भसान भईला के बाद सब केहु दुखि मन से घरे आई ।

अब -

ढाला प चार गोडा भांग खईले , मुह मे एक लंगे खईनी दबले भा एगो दु गो महुआ पिअले भा गुटखा के डबल पाकिट मुह मे फारत आवत जात सब गाडी वालन से पईसा असुलत ( चँदा त कहे के बा ) रोज सांझि खा ओहि मे से कुछ निकाल के ठेका प चहुंप जाये के बा ।

अब बरिआरी असुलात बा त फेरु अउलाह पईसा भेटा जात बा फेरु शुरु होत बा डरामा , पंडाल के ठीका दिआ जात बा , मुर्ति के अईला के बाद जवन लंगटई शुरु होत बा , अस अ अस फुहर पातर गाना बाजत बा , अतना पियक्कडई होता जवना के कवनो थाह नईखे ।

कहियो कवनो बाईजी आवत बाडी नाचे खाति त कहियो प्रोजेक्टर चलत बा ।

गांव के बड जेठ बुजुर्ग मेहरारु अब दर्शन करे नईखी स आवत स आ भसान के दिने मय पी के देहि भाजत कोलनाला ले जात बाडन स । भसान भईला के बाद ओजुगे से बाजार मे जा के नाक प ले महुआ भा अंग्रेजी आ ओकरा संगे मीट मछरी ।

खैर चलल जाउ हमनियो के बोलल जाउ ! 

जय दुर्गा मईया के ! 

जय भोजपुरी