एफ डी आई कवनो अनतफल ना ह बाकि तबो ....

प्रनाम आ जय भोजपुरी

बडा चर्चा हो रहल बा , हेने होने सगरे जेने देखs ओनिये लोग अझुराईल बा की एफ डी आई एफ डी आई रिटेल मे आवत बा , केहु कहत बा देश एक दम चकचका जाई त केहु कहत बा की ई ईस्ट इंडिया कम्पनी लेखा होई देश बिका जाई ।

केहु तर्क दे रहल बा की एकरा अईला से किसानन के फायदा होई मजदुरन के फायदा होई लोगन के नोकरी मिली त केहु के तर्क ई बा की एकरा अईला से छोट छोट दुकानदार , माने पंसारी के दोकानी बनि हो जईहन स , तुरहा बरबाद हो जईहन स ।

खैर एह कुल्हि मे गईला से पहिले देखे के बा की ई एफ डी आई का ह ?

फारेन ( बिदेस ) डाईरेक्ट ( सीधे/प्रत्यक्ष ) इंवेस्टमेंट ( पईसा लगावल / निवेश ) आ रिटेल माने खुदरा व्यपार - सोझ साफ माने इहे भईल की बिदेस से खुदरा व्यपार वाला जवन क्षेत्र बा ओजुगा बिदेस से सीधे सीधे पईसा आई ।

सवाल ई उठत बा कि का एकरा पहिले एफ डी आई कवनो क्षेत्र मे आईल बा लागु भईल बा ?

त एकर जवाब बा हँ आ उ कुल्हि क्षेत्र बा - सर्विस सेक्टर ( फाईनांस आ नान फाईनांस ) , टेली कम्युनिकेसन ( मोबाईल आ दुर संचार व्यवस्था ) कम्प्युटर साफ्टवेअर आ हार्डवेअर , रिअल स्टेट ( ममल्टी प्लेक्स सिनेमा हाल आ हाउसिंग कालोनी ) , कंस्ट्रक्सन , दवाई आ फार्मा के क्षेत्र मे , बिजली के क्षेत्र मे , आटोमोबाईल के क्षेत्र मे , धातु से सम्बन्धित उद्द्योगन के क्षेत्र मे , पेट्रोल गैस के क्षेत्र मे , फर्टिलाईजर के क्षेत्र मे , होटल मे , ट्रेडिंग के क्षेत्र मे , इलेक्ट्रिकल कल पुर्जा के क्षेत्र मे , प्रिंट मिडिया आ सुचना के क्षेत्र मे , सिमेंट आदि के उद्योग मे , बन्दरगाह आदि के क्षेत्र मे , इंडस्ट्री के मशीनन के क्षेत्र मे , खाये वाला सामान बनावे वाली कम्पनियन के क्षेत्र मे , टेक्स्टाईल माने कपडा लाता के क्षेत्र मे , समुन्दर से आवे जाये वाला ट्रांस्पोर्ट के क्षेत्र मे , खदान के क्षेत्र मे , पढाई लिखाई शिक्षा के क्षेत्र मे खेती बारी से जुडल कल पुर्जा के क्षेत्र मे आ मोटा मोटी धई ली कुल्हि तिरसठ चौसठ ( 63-64)  को क्षेत्र मे एफ डी आई बडुवे ।

कवना कवना राज्य मे ई एफ डी आई बडुवे ?

भारत के लगभग हर राज्य मे एफ डी आई बडुवे बाकि टाप टेन ( सबसे ज्यादा जवन दस गो राज्य ) मे यु पी बिहार नईखे ।

रिटेल मे एफ डी आई के का माने बा ?

रिटेल माने खुदरा व्यपार के क्षेत्र मे एफ डी आई माने की खुदरा के क्षेत्र मे बेचे किने खाति बिदेसी कम्पनी पईसा लगईहन स । ठीक ओइसही जईसे भारत के व्यपारी लोग पईसा लगावे ला , फरक अतने बा की पईसा लगावे वाला बिदेसी कम्पनी होईहन स । आ ओह कम्पनी मे 51 परसेंट हिस्सेदारी बिदेशी कम्पनी के होई ।

का रिटेल मे एफ डी आई माने वालमार्ट ह ?


ना , वालमार्ट एगो कम्पनी ह जवन रिटेल के क्षेत्र मे कई जगहा पईसा लगवले बिआ आ आपन दोकानी खोलले बिआ , एकरा अलावा जायंट , कैरी फोर जईसन कई गो अउरी कम्पनी बाडी स जवन कई गो देसन मे आपन कारोबार चलावत बाडी स ।

अउरी कहा कहा रिटेल मे एफ डी आई ब ?

चीन सिंगापुर ब्राजील भा अउरी कई गो विकसीत भा विकासशील देशन मे 50- 100% एफ डी आई के सुविधा बडुवे ।

एकरा से नुकसान का हो सकेला ?

- लोगन के डर बा की ई आई त फेरु छोट छोट दुकानदार लोगन के कारोबार बन हो जाई ।

- लोगन के डर बा की लोग छोट छोट दुकान से सामान कीनल बन कई दी आ बिदेसी कम्पनियन के दोकान से सामान किनी ।

- लोगन के डर बा की ई कम्पनी देश के अपना हिसाब से चलावे लागी जब चाही त दाम बढाई जब चाही दाम घटाई ।

- लोगन के कहनाम बा कि देस मे बिदेशी सामान के भरमार हो जाई आ देसी सामान के केहु पुछी ना

एकरा से फायदा का हो सकेला ?  कई लोगन के कहनाम बा की एकरा से फायदा कुछउ नईखे बाकी हमार कुछ तर्क बा आ हम एह के पछ मे बानी काहे कि -

- भारत मे पहिलही से कतना बिदेसी सामान भरल पुरल बा , चीन से ले के अमेरिका ले , हर जगहा के सामान बाजार मे भरल बा , एह से ई कहल की बिदेसी सामान भरी जाई गलत बा ।

- सरकारी नियम के हिसाब से ई लोग ओजुगे दोकानी खोली जहवा 10 लाख से बेसी लोग रहेले एह से ई कुल्हि दोकानी खलिहा बड बड शहर मे ही खुल सकेली स , माने एह कुल्हि दोकानन के कुकुरमुत्ता लेखा बढे के चानस ना भेटाई ।

- छोट छोट दोकानी वाला लो रसीद ना देला लो आ देबो करे ला लो त ओकर कवनो भैल्यु ना रहेला बाकी एह मे अईसन कुल्हि ना होई ।

- ई कुल्हि कम्पनी अधिकतर सामान ( कम से कम दाम राखे खातिर ) भारत से खरीदिहन स , खास कई के आनाज , फल आ तरकारी , काहे की ई कुल्हि सामान दोसरा देस से ले आवे मे बेसी पईसा लागी आ ई कुल्हि चीझु भारत मे आराम से भेटा जाई ।

- चुकि आनाज फल आ तरकारी किसानन से किनाई एह से ई एगो उमेद बा की किसान लो के नीमन आ फिक्स रेट भेजाई , गहंकी जोहे के ना परी ।

- सामान नीमन मिली , काहे की ई कुल्हि कम्पनी एहि से मसहुर बाडी स काहे की नीमन सामान कम दाम प बेचल एकनी के असली तरिका ह ।

- चुकि एह कम्पनियन के आपन कीने बेचे वाला टीम रहेले जवना मे लम सम मय लोग भारते के रही माने की रोजगारो मिली ।

- एह कम्पनियन के कीने वाला बिभाग डारेक्ट ओजुगा से सामान किनिहन स जहवा ओह सामान के पैदावार होत बा , उ सामान बनत बा काहे की ई लो कम से कम दाम मे बेचल चाही ।

- चुकि छोट छोट किराना / पंसारी के दोकानी से लोग महीना भर के राशन ना किनेला , आ किनबो करेला त क्रेडिट प किनेला एह से उ लो अईसना दोकानी पे ना जाई ।

- किसानन के सबसे बड समस्या अपना पैदावार के बेचला के बा , कही राखला के बा । अब एह कुल्हि के वजह से कीने वाला त फिक्स होईये जईहे , रेट त नीमन मिलबे करी संगे संगे ई नियम भी बा की एह कम्पनियन के नाफा जवन होई ओकर कुछ हिस्सा ( 30-50 प्रतिशत ) शीत गृह ( कोल्ड स्टोरेज ) , आनाज भंडारण ( स्टोर ) आ अनाज फल तरकारी के ढोवे खाति ट्रांसपोर्ट के बेवस्था मे लागी ।

जवन राज्य एह कम्पनियन के अपना राज्य मे नईखे चाहत ओकरो खाति उपाई बा , कि ई कम्पनी ओहि राज्य मे जईहन स जवन राज्य एकनी के आवे दी , माने नियम कानुन बनाई की एफ डी आई ओहु लो के राज्य मे आ सकेला ।

आपन बात

अउरी कुछ नाफा नुकसान हो सकेला जवना के रउवा सभे जोड घटा सकेनी । ई कुल्हि हम सैध्यांतिक जवन होखे के चाही ओह बात के धईले बानी , हमरा देखे से आ हमार जवन अनुभव कहत बा आ हम चीन , सिंगापुर दुबई अबुधाबी मे जवन देखले बानी ओह आधार प कहत बानी काहे की एह देसन मे अईसन कुल्हि कम्पनी बाडी स आ छोट छोट दुकानदार लो भी बा आ नीमन बिजनेस दुनो के होत बा ।


संगे संगे हम इहो कहल चाहब की वालमार्ट जवना के ढे हाला बा उ दक्षिण कोरिया से आ जर्मनी से आपन दोकानी बन कई के वापस चलि गईल काहे की जर्मनी आ दक्षिण कोरिया के लोगन के अपना छोट छोट दुकानदारन से सस्ता आ नीमन सामान मिलत रहे । त एह एफ डी आई से कवनो ना पहाड टुटत बा आ ना कवनो पहाड ठाड होत बा , हमरा देखे से दु गो फायदा जवन लउकत बा उ ई बा की किसानन के खरीददार , बरिआर खरीददार भेटा जईहे , आ खेती बारी प्रोफेसनल तरिका से होखे लागी काहे की एह कुल्हि से कांट्रैक्ट फार्मिंग , खेती बारी मे इंश्योरेंस जईसन चीझु आ जाई आ संगे संगे एक नीमन कम्पटीसन बाजार मे बने लागी भा बन जाई । माने सब कुछ सरिहरा जाई आ व्यवस्थित ढंग से होई आ जवन हेने होने से बिदेशी माल आवत बा उहो सरिहरा जाई ।

लोगन के ई शंका बा की ई कम्पनी कमाये खाति आवत बाडी स , त हम कहल चाहब की केहु पईसा कमाही खाति लगावेला ,बाकी उ कतना पईसा ले के जात बा कतना पईसा रउवा देश मे लगावत बा एह के भी देखल जरुरी बा ।

चेक प्वाईंट

सरकार के संगे संगे समाज के भी अपना के ओस्तवार राखे के जरुरत बा , आर टी आई जईसन चीजन से एह लोगन के नाक मे नाथ लगवले रहे के चाही , कंज्युमर फोरम आदि मे अगर कुछ गडबडी होत बा त एह लोगन के टांगे के चाही ।

लम सम इहे बा एह एफ डी आई मे , एकरा वजह से ना छाती उतान कई के चले के जरुरत बा आ ना एकरा वजह से मुडि नवाई के चले के जरुरत बा ! ई कवनो अईसन चीझु नईखे जवना के वजह से केहु गुलाम हो जाई आ केहु रउवा प राज करे लागी । ई रउरा हाथ मे बा , देसी युज करब त देशी कम्पनी चमकिहन स आ बिदेशी करब त देशी आ बिदेसी दुनो चमकिहन स ।

भारत के कई गो कम्पनी गल्फ मे रिटेल मे इंवेस्टमेन्ट कईले बाडी स जईसे लु लु बिआ , मनामा बडुवे । अब जब सब कुछ वैश्विक हो गईल बा आ हो रहल बा ओह समय मे एह कुल्हि चीजन प रुढिवादी बिचार राखल उचित ना कहाई ।

बिल्कुल एह कुल्हि से किसानन के दीन दासा नईखे बदले वाला बाकी ह काफी हद तक सुधार के गुंजाईस बा !

बाकी सब अब बतकही मे आई , कुछ सवाल जवाब होई त ओह मे आई , त रउवा सभ के सुझाव के इंतेजार बा ।

जय भोजपुरी