चतुरी चउबे - स्व .कैलाश राय 'कमरपुरी

स्व. श्री कैलाश जी के परिचय उँहे के स्टाईल मे -

चौसा बक्सर बिच में गंगा से कुछ दूर 
 नाव कैलाश बाटे गाँव कमरपुर

"चतुरी चउबे"

चटकदार  चरखाना लुंगी ,
                                            पहिर के चतुरी चउबे,
मर्जादी बरियत खियावे ,
                                         दुपहरिया में गउबे ।
काट नर इली गंजी रहे ,
                                       हाँथ में रहे घडी,
दाडी मोछी सफाई रहे,
                                          बहसत रहले बड़ी ।
सियल मुह रहे लुंगी के ,
                                             पछुआ रहे ना खसल,
हाली हाली चलत रहले ,
                                              लुंगी गोंड में फसल ।
लटपटाइ के लंगटा होके ,
                                         गिरले बीचे पांति,
फूटी गइल दही के हांड़ी ,
                                           खपड़ा गइल आंती ।
कुछ देरी बेहोश हो के ,
                                            ओसही पडल रहले ,
'हाय हाय चउबइया मुवल'
                                           सभे लोग कहले ।
पंखा पानी दिहल गइल तब ,
                                              चतुरी चउबे जगले,
झटपट लुंगी पहिर के आपन ,
                                                गूंगी साध के भागले ।

स्व. कैलाश राय " कमरपुरी " जी के काव्य संग्रह "समाज दर्पण" से

जय भोजपुरी