अईँठल रहनि

जय भोजपुरी आ प्रनाम

छाती तानि के खुब घुमले बुआ
अब तनि, माई बाबु,  
अपना आजा अठराजा के
थाती सम्हारि के त देखु,
ढाहे गिरावे के बात त
तोरा ओठ से रोजे चुअत रहेला
एक हाली अनका ओठ प,
अपने खाति, इचिका सा
नेह छोह उतारि के त देखु
चनरमा के सबदिना उतरेले
ते अपना गीत गजल मे
एक हाली ओहि चनरमा के
गरीबन के छिपा मे
रोटी निअर उतारि के त देखु
बडा जोम्ह फाटsता तोरा देहि मे
लाम चाकर हो के चलs तारे सरेहि मे
अब तनकी सा अपना के बटोर ले
नीमनका रहनिया के नीमन से खखोर ले
बाउर दिन मे इहे काम आई
बेरा कुबेरा तोरा आगे
सरधा से सभ मुडि नवाई
बाकि,
जे डुबल रहले एह फह फह मे
तs खतम हो जाई जवानी तोर,
बात के बुझले त ठीक, ना तs  
थुकहु लायक ना रही कहानी तोर...  

जय भोजपुरी