Come, let's do something for Bhojpuri...

बाबू आन्हर माई आन्हर : स्व. श्री कैलाश गौतम

बाबू आन्हर माई आन्हर
हमै छोड़ सब भाई आन्हर
के-के, के-के दिया देखाई
बिजुली अस भउजाई आन्हर॥

हमरे घर क हाल न पूछा
भूत प्रेत बैताल न पूछा
जब से नेंय दियाइल तब से
निकल रहल कंकाल न पूँछा
ओझा सोखा मुल्ला पीर
केकर-केकर देईं नजीर
जंतर-मन्तर टोना-टोटका
पूजा पाठ दवाई आन्हर॥

जे आवै ते लूटै खाय
परचल घोड़ भुसवले जाय
हँस-हँस बोलै ठोंकै पीठ
सौ-सौ पाठ पढ़वले जाय
केहू ओन‍इस केहू बीस
जोरै हाथ निपोरै खीस
रोज-रोज मुर्गा तोरत हौ
क‍इसे कहीं बिलाई आन्हर॥

इनकर किरिया उनकर बात
सोच-सोच के काटीं रात
के केतनी पानी में ह‍उवै
मालुम हौ सब कर औकात
फूटल जइसे करम हमार
ओरहन सुन-सुन दुखै कपार
आपन तेल निहारत नाँही
दिया कहे पुरवाई आन्हर॥

पूत जनमलैं लोलक लईया
बोवैं धान पछोरैं पा‍इया
घर-घर चूल्हा अलग करवलीं
कुल गुनवां क पाखर अ‍इया
कुछ अइसन कुन्डली बनल हौ
रस्ता रस्ता कुआँ खनल हौ
न‍इहर ग‍इल रहल मेहरारू
ली आइल महगाई आन्हर॥

हाहाकार हौ चारों ओरी
पूरुब आग त पच्छिव चोरी
ओकरे कैसे कवर घोटाई
जेकर अहरा कुकुर अगोरी
दूध क माछी नाक क बार
दूनो देखली ए सरकार
एक आँख क कवन निहोरा
जहा तीन चौथाई आन्हर ॥

ई कविता कैलाश जी के कविता संग्रह " तीन चौथाई आन्हर " से लिहल बडुवे

साभार - कविता कोष

Tags: :, आन्हर, कैलाश, गौतम, बाबू, माई, श्री, स्व.

16 members like this

Comment by Anoop Srivastava on September 4, 2012 at 12:39pm: नवीन भाई जी प्रणाम,
रोजमर्रा जिनगी के खीचा-तानी के बहुत करीब से दर्शावत बा ई रचना ....घर-परिवार, समाज के परिधि में छटपटाहट, वेदना आ खींझ सबकुछ समेटले बा आदरणीय कैलाश जी के ई रचना ..... रउआ के बहुत बहुत धन्यवाद एकरा के हमनी के बीच ले आवे खातिर ...जय भोजपुरी ।

Comment by Ashutosh Ranjan on September 5, 2012 at 11:43am: नवीन भाई प्रणाम,

बहुत सुन्दर कविता.....शेयर करे खातीर धन्यवाद,

जय भोजपुरी

Comment by sanjay panday on September 5, 2012 at 12:52pm: navin bhaiya parnam a jai bhoj[puri |

bahut sunnar rachana bhai ji |

ejat rahi khoj khoj ke hamani ke jahat bani |

bahut bahut dhanyavad |

jai bhojpuri |