Come, let's do something for Bhojpuri...

“याद के झोंका”

सबके प्रणाम,

तोहरी याद के झोंका अइसन, झूला झुला गइल,
अब का कहीं, हमरा के त, सबकुछ भुला गइल,
तोहरी याद के झोंका अइसन . . . . . . . ।

हमरी तकला पे लजाइल, फेर बचा के कनखी मारल,
ऊ, भर दिन के बे-चैनी, अउरी राति-राति ले, जागल,
ऊ राति - राति ले जगलका, फेरसे जगा गइल,
तोहरी याद के झोंका अइसन . . . . . . . ।

हम्मे पाछे से रिगावल, सोझे ना आँखि मेरावल,
फेर, सबका से बचा के, इसारा मे, कुच्छु कहल,
ऊ इसारा मे कहलका, आजु फेर गुदगुदा गइल,
तोहरी याद के झोंका अइसन . . . . . . . ।

हमरी कहला पे ना सुनल, फेर पाछे मुड़ के ताकल,
ऊ, सीढ़िया पर के, तेजी, ऊ कोठा पर से, झाँकल,
ऊ कोठा पर से झँकलका, जियरा हिला गइल,
तोहरी याद के झोंका अइसन . . . . . . . ।
तोहरी याद के झोंका अइसन, झूला झुला गइल,
अब का कहीं, हमरा के त, सबकुछ भुला गइल,

धन्यवाद आ जय भोजपुरी

अनूप

15 members like this

Comment by नबीन भोजपुरिया ( NB ) on September 1, 2012 at 8:50pm: प्रनाम आ जय भोजपुरी अनुप भाई

ढाही देहनी महाराज , रउवा त अईसन याद परवनी की हमहु हेने होने लोटियाये लगनी :-)

बेजोड लिखनी भाई जी ।

जय भोजपुरी

Comment by Umesh Gautam on September 2, 2012 at 9:03am: अनूप भैया , प्रणाम आ जय भोजपुरी । बहुते सुनर , बहुते नीमन । जय हो !

Comment by Rajeev Mishra "राजीव भोजपुरिया" on September 2, 2012 at 3:00pm: अनूप भाई जी प्रणाम ,

वाह भाई जी एक दम बवाले बा ....जानीं जाईं की सोना निहन साँचे बा ........

गर्दा बा अनूप भाई जी !

जय हो जय भोजपुरी !

Comment by Ashutosh Ranjan on September 5, 2012 at 11:48am: अनूप जी प्रणाम,

बहुत बेजोड़ याद परवनी.......वईसे अब इयाद के इयादे रहे दियाव त निमन बा :))......

बेजोड़..बहुत बढ़िया....

जय भोजपुरी