बिकास के रेस मे टुटत दरकत बिगाईल फेंकाईल रिश्ता नाता

प्रनाम आ जय भोजपुरी

भारत संस्कार के देश ह भारत कई गो भाषा के पहिचान के देश ह भारत सन्युक्त सम्म्लित परिवार के देश ह भारत दुनिया के एक संगे रहे  सिखावेला नीमन से बोले बतियावे सिखावेला आदत रहन मय बतावेला बाकि अब ? 

ब्रांडेड कपडा ना रहे , रकम रकम के खाये के ना मिलत रहे , रकम रकम के खेलौना ना रहे बाकी आजु से 18-20 साल पहिले जवन चीझु अपनापन मे मिलत रहे उ ब्रांडेड कपडा , रकम रकम के खाना पीना , खेलौना से बहुत बेसी रहे । एह बात के अनुभव तब होला जब रउवा अकेले मे अपना पाछे सोची । 

आजु अपना मेहरारु से दुपहरिया मे खाये घरी बतियावत रहनी ह त इहे कुल्हि दिमाग मे आवत रहल ह आ हमनी के बीचे इहे कुल्हि बतकही चलत रहल ह की आजु के जबाना मे कतना आसान हो गईल बा अपना चाचा चाची बडका बाबुजी बडकी माई भईया भाभी फुआ मौसी मामा मामी आ एह लोगन के लईका लईकिन के । गांव के आस पडोस के भुलाईल कतना आसान बा कतना आसानी से हमनी के भुलवा दे तानी जा !

हमनी के माई बाबुजी के भुलवा देत बानी जा आ एह कुल्हि लोगन के भुलवावे मे मदत करत बा आजु के कम्युनिकेसन सिस्टम ( मोबाईल इंटरनेट आदि ) तड दे लगाव बतियाव उ ओने भले कतनो दुख मे रहिये बाकी मोबाईल प सब नीमने बा आ रउवा कतनो बिपत्ति मे रही सब नीमने बा । टीप छुवे खाति कोरम पुरा करे खाति हाल चाल लिआत दिआत बा बाकि खांटी पन रिश्ता के खाटीपन जवन बा तवन त बहुत आसानी से आराम से सरिहारी के खतम हो गईल बा आ तनी मनी कहि बाचि गईल बा त खतम होखे के कगार प बा ।

हम अपना गांव मे आंखि के सोझा घर बटात देखनी , एगो टोला मे आजु से 18-20 साल पहिले 20 गो घर रहे आजु ओहि टोला 120 गो घर बा , मय लो एके खुंट के बाकी अलगा होखे के स्पीड पहिले से ढेर बेसी ।

जवन घर एक मे माने की सन्युक्त परिवार मे बा ओह घर व्यथा एगो अलगे बा , आ उ ई की ओह घर के लगभग मय लो बहरा रहत बा , पहिले साल छामाही शादी बिआह परब तीज के ले के लोग आईयो जात रहे त एह घरी बेटा बेटी के पढाई लिखाई नोकरी चकरी के अईसन आफत बा की दुईयो दिन खाति आईल गईल पहाड भईल बा ।

बिआह शादी , त पहिएल छव महीना पहिले बिआह तई हो जाई , एक महीना पहिले से हित नात नजदिकाह रिश्तेदार लो आवे लागी लो रोज रकम रकम के खाना बनी घरउ खाना , गीत गवाई दुआर प चल पहल होखे लागी समान बटोरे से ले के तर तईयारा बिआह के दिन ले आ बिआह भईला के दु चार दस दिन आगे ले जवन चल पहल लउकी तवन आवे वाली बहुरिया के ओह घर मे नीमन से मन लगावे खाति काफी रहत रहल ह बाकी आजु के जुग मे , टेंट से खियावे ले , पईसा छींट दिही बिआह के दिने दुआर प सब कुछ हाजिर , माडो आ मंडप के जगहि हाल ले ले बा , तिलक बरईछा दोंगा के जगहि प रिसेप्सन होखत बा , मुह देखाई त बस जीभ रिगाई हो गईल बा ।

सांच पुछी त हर एक लंगे से हमनी समाज मे जवन एकता अखंडता जवन चीझु समाज के बान्ही के राखत रहल ह ओह मे दरार परी गईल बा भा दरकत बा आ ई अईसन दरकल जाता जवना प ना कवनो चिपी सटाई ना कवनो पेवन लागी ।

एकरा के तुरे मे योगदान सबकर बा आ एकरा के जोडे भा सम्हारे मे सबकर योगदान चाही । हम इहो जानत बानी की हमरा बात के असर केहु प ना परी बाकी ई बात त हम कहिये सकत बानी की हाड मास के देहि बस नावे के हाड मास के बा असल मे कल पुर्जा लोहा लकड के देहि हो गईल बिआ । जवना प कुछउ के कुछ असर होखे वाला नईखे ।

हो सकेला अकेला मे रोई के अपना गलती के एहसास हो जाउ बाकी एह से कुछ नईखे होखे वाला । लोर जिआन होई मन थोर होई फेरु उहे काल्हु सबेरे आफिस जाये के बा बेटी के तबियत नीमन नईखे । 

रासन पताई मे दाना दवाई मे 

हमनी के जिनगी

बस अतने मे पिसाईल बिआ 

अनका के देखि के

छाती पिटाता

रहन संस्कार सभ

रोड प छिटाता

लुकवावे चोरावे मे 

आपन बचावे मे

अनकर ओरवावे मे

लंगी लगावे मे

हमनी के जिनगी

बस अतने मे अझुराईल बिया 

जय भोजपुरी